اسلام آباد۔19اگست (اے پی پی) وزیراعظم محمد شہباز شریف آکھیا جو مینہ اتے چھل توں متاثرہ ٹٻراں اچ 37 ارب روپے تقسیم کیتے ویسن، امداد ݙیوݨ دا اے عمل ترائے ݙینھ اچ پورا کر ڳھدا ویسی۔ اے ڳالھیں انہاں جمعے کوں مینہ اتے چھل دے متاثرین اچ نقد مالی امداد ݙیوݨ دی تقریب توں خطاب کریندیں ہوئیں آکھی۔ ایں موقع تے وفاقی وزراء مریم اورنگزیب، مفتاح اسماعیل، احسن اقبال، شاہ زین بگٹی اتے مشیر امور کشمیر تے گلگت بلتستان قمر زمان کائرہ سودھے بئے موجود ہن۔ وفاقی وزیر برائے تخفیف غربت تے سماجی تحفظ شازیہ مری تقریب اچ آن لائن شرکت کیتی۔ وزیراعظم تقریب توں خطاب کریندیں ہوئیں اڄوکے مینہ اتے چھل پاروں ٻہوں ضیان تھیے اتے سینکڑاں لوک جاں بحق اتے بےگھر تھین۔ انہاں دا مال مویشی، گھر اتے انفراسٹرکچر دا ضیان تھیے۔ ساریاں توں ودھ تباہی بلوچستان اچ تھئی اے۔ بلوچستان اچ سیلاب متاثرین کیتے امدادی کاروائیاں اچ کورکمانڈر کوئٹہ سودھے پاک فوج دے چھی افسر شہید تھیے۔ سیلابی صورتحال اچ میں ذاتی طور خود مختلف علاقیاں دا دورہ کیتے۔ انہاں آکھیا جو چیئرمین این ڈی ایم اے لیفٹیننٹ جنرل اختر نواز اتے صوبیاں اچ پی ڈی ایم اے، صحت دے محکمے اتے این آئی ایچ سودھے بئے اداریاں اچ حصہ ڳھدا۔ وزیراعظم آکھیا جو اڄ ولا طوفانی مینہ شروع تھیے، وزیراعلیٰ سندھ ݙسیا جو اندرلے سندھ اچ ٻہوں بارشاں تھین۔ اینویں بلوچستان اچ وی زیادہ مینہ اے۔ وزیراعظم آکھیا جو اوکھے ویلھے پوری قوم کوں رَل تے ایں صورتحال دا مقابلہ کرݨے۔ صوبیاں اتے عالمی شراکت داراں نال رَل تے ایں اوکھی صورتحال نال نبڑدے پیوں۔ 15 لکھ متاثرہ ٹٻراں کوں فی ٹٻر 25 ہزار روپے نقد امداد ݙتی ویسی۔ انہاں ٹٻراں دی کل بندیاں دی تعداد نوے لکھ ٻݨدی اے۔ امداد ݙیوݨ دا اے کم ترائے ݙینھ اچ پورا کر ڳھدا ویسی۔ انہاں آکھیا جو سیلاب متاثرین دی امداد کیتے 37 ارب روپے ݙیوݨ تے وزیرخزانہ دا شکریہ ادا کرینداں۔
